METİN:
Maruz-ı
Kullarıdır ki;
Nefs-i
Sivas’da Sarışeyh mahallesinde mütemekkin Rum reâyâ ma‘lûmü’l-esâmî Hıristiyan
meyyitlerini kadîmden beru Rum milletine mahsûs olan mezarlıklara defn edecekleri
halde Ermeni milletinden birtakım kesân Rum Hıristiyanları üzerine hücûm ve
sizin mezarlığınız yoktur diyerek zikrolunan meyyitleri meydana çıkarmış ve vâli-i
memleket tarafına ifâde olunmuş ise de Ermenilerin varzabeti [vardapeti-papazı]
kendi milletini ifsâd edip vâli-i memleket ve hâkim-i belde ve me’mûrîn-i
sâirenin emr u tenbîhlerine muhâlefet göstermiş ve envâ‘-ı harekât-ı nâ-revâ
ile kadîmden beru Rum milletine mahsûs olup Rum kilisesi havlusunda bulunan
mezarlıkları fuzûlî zabt ve Rum milleti terzîl ve tahkîriyle meyyitlerini dahi
mezardan çıkarup bî-bâk ü pervâ zokakda bırakmakda oldukları beyanıyla zikr
olunan mezarlıklar Rum milletine mahsus olduğu meşhûd bulunduğu hasebiyle Ermenilerin
müdahalesini def‘ ve kadîm u sâbıkı misillü Rum milletine ibkâ olunması
irâdesini şâmil bir kıt‘a fermân-ı celilü’ş-şân inâyet ve ihsân buyurulması bu
def‘a ahâlî-i rum reâyâ kulları tarafından mahzar takdîmiyle niyâz ve istirhâm olunduğu
ve Ermeni milletinin ve varzabetlerinin harekât-ı tahkîrâneleri ve Rum
milletinin mezarlıklarına tasallutları vücûhla mugâyir-i rızâ-yı âlî idüğü
derkâr bulunmuş olmağla her vechile savâb-dide-i re’y-i dâverâneleri buyurulur ise
müdâhale-i vâkı‘ânın men‘ ve def‘-i husûsuna müsâ‘ade-i seniyye erzâni ve şâyân
buyurulmak bâbında ve her hâlde emr u fermân ve inâyet-i bî-pâyân hazret-i
men-lehü’l-emrindir.
Mühür
[Bende Antimos Patrik-i Millet-i Rûm-ı Âsitâne ve Memâlik-i Mahruse Hâlâ]
EMİRNÂMESİ
YAZILA